الجمعة، 1 فبراير، 2013

عم إبداع مات


الإسم مش غريب علينا ولا حاجة احنا شعب بنموت كل حاجة مبتعجبناش أو مبنستحملهاش، مبنقدرش فكرة التعايش السلمى؛ انت مسمعتش عن عم عشم اللى مات، ولا عن اللى اختشوا فماتوا.


أوقات بكون زهقان فبفتح الفيس عادى أو تويتر أشوف الناس بتحكى فى ايه يمكن ألاقى حاجة جديدة، انا من زمان اكتر من سنة وانا مقاطع كل الصفحات الكبيرة، والتويبس المشهورين ومكتفى بفكرة التعايش مع الناس نفسها، ناس عادية بينقلوا الخبر من وجهة نظرهم، رأيهم تريقة أحيانا على الواقع، حتى تحركات الناس ضحكهم من واقع عايشينه فى اللحظة، هبلهم وجنونهم احيانا ! محتاج اشوفه، مجرد هروب من فكرة انى امشى ورا حد معين لمجرد ان نوره عالى حبتين او سابق خطوتين، لكن للاسف اللى اكتشفته  كان اعجاز بكل المقاييس المصرية والدولية الكل مظلم لا جديد به ولا روح فيه ولا ابداع حتى .


اكتشفت ان الكل معجب بفكرة copy&paste وفكرة دور الداعية اللى طول النهار بينشر احاديث وايات قرآنية، طبعا بلا دخول ف النوايا، لكن فين دورك انت فهمك انت، انت قلت ايه جديد النهاردة، عملت ايه جديد، فين اللى عندك بيكبر اشوفه، انا مش شايف اى حاجة غير بغبغان بينقل وخلاص. الناس معدش عندها حتى وقت تفكر ممكن ايه تعمله، او ايه ممكن تكتبه، فكرة الابداع نفسها والتجديد مبتخطرش على بالهم، الناس عاوزة السريع اللى يخلص وينهى الدقيقة اللى عايشنها ويفوتوا على غيرها.


انا فاكر اخر كتاب قريته ( الفيل الأزرق ) مسروق وآخر فيلم شفته ( على جثتى ) مسروق، حتى آخر بوست على الفيس بوك صفحتين ورا بعض منزلينه مسروق من صفحة تالتة محدش عارفها، اخر تويتة  شفتها مسروقة. متخيل المنظر فى اخر تعاملات بينى وبين الناس كلها مسروقة من حد انا معرفوش.

·        انت بئا عمرك سألتى نفسك ايه اخر كلمة قلتها متقالتش قبل كده
·        ايه اخر حاجة عملتها حسيت انك الأول فيها ومحدش سبقك
·        حبيت؟ ايه اخر كلمة قلتها لحبيبك ؟ ( بحبك ) قديمة وبايخة ومسروقة
·       
امتى اخر مرة ابدعت فيها، وحسيت ان هو ده اللى كان لازم يتعمل ومكنش غيره ينفع

عندك اجوبة على السؤال دى كلها ؟ مظنش عشان كده بكل تاكيد ننعى لكم عم ابداع رحمة الله عليه

هناك 8 تعليقات :

  1. gamda 2wyyyyyyyyyyy

    ردحذف
    الردود
    1. منور يللى متتسماش :)) طب مش تسجل تعليقك حتى باسمك عشان اشكرك

      حذف
  2. و الله عندك حق
    بس بعترف انى عملت كتير محدش سبقنى فيه
    أسعدنى وجودى

    ردحذف
    الردود
    1. اكيد المشكلة فى اللى بيسرق بيوصل اسرع مننا بكتير :) اكيد وجودك اسعدنى انا

      حذف
  3. حلو اوي اللي انت كاتبه
    احنا مبدعين كجيل والله بس مش لاقيين لاحد يهتم ولا حد يسمع

    ردحذف
    الردود
    1. ممكن كجيل اه انما لو ركزنا هنلاقى ناس كتير اوى ماشية فى الزحمة مبتفكرش بتنقل وبس عقلها مهمته فى اجازة رسمية ابداعها لسه مصحيش من النوم
      انما كجيل اكيد مختلفين والفضل بعد ربنا لناس شغلت مخها وعدت بينا كلنا بس يارب تكمل على خير
      منورة:)

      حذف
  4. جميله جدا بجد تحفه
    فى تقدم انشاء الله

    ردحذف
    الردود
    1. اشكرك جدا يبوحميد منورنى دايما

      حذف

هذا ما كان منى، فاللهم اغفر لى ما أخطأت فيه