الأحد، 18 نوفمبر، 2012

وحشتنى يا ابنى انت واخواتك

قطار اسيوط يوم 17/11/2012 قتل 50 غرسة طاهرة ويداه ملطختان بدمهم الاخضر

إنا لله وإنا إليه راجعون، 
إبنى الحبيب، 
سامحنى، يا ابنى أنا اللى عملت فيك كده، سامحنى يا بنى إنا اللى مخترتش وطن يصلح للعيش فيه، انا اللى اتسرعت فى تحمل مسئولية مش قدها، يقتلوك وانت بتتعلم يبنى ، مش عارف اقول ايه لك يا حبيبى، وحشتنى ضحكتك وصوتك العالى فى البيت، وحشنى جريكك ولعبك مع اخواتك، اه صحيح سلم لى على ابن عمك، وابن خالتك، مش كلكم مع بعض بردو، 
اه لو تعرف ايه اللى ف قلبى وناره القايدة 
ببكى وبصرخ ومفيش فايدة 
قتلوك كلاب مفيش فى قلوبهم رحمة، قتلوك قتلهم ربنا وحرق قلوبهم بحق حرقة قلب امك، انا خايف عليها يبنى انت وولاد خالتك التلاتة، انت واحشنى اوى يا حبيبى نفسى ارجع بالليل ازعقلك عشان تكتب الواجب، اااااااااه الواجب
الواجب اللى مكنتش بتعمله وياريتك ما مشيت ف طريقه، بس كنت هعملك ايه يبنى ادخلك الجيش وسنتين تلاتة وتجى لى جثة بردو، ولا يمكن لو كنت كبرت وخرجت تلعب بردو هتجى لى جثة، تقريبا فى قرار اعدام نص الشعب بس بينفذوه ولاد الكلب فى زرعنا ونبتنا الطاهر طب ياخدونا احنا خدهم ربنا، انا عارف انك ممكن تكون احسن دلوقتى فى مكان تانى مفيهوش نجاسة وقذارة واهمال ناس وسخة معندهمش ضمير ولا يعرفوا ربنا،، اوعى تزعل منى انى علمتك او سبتك تتعلم انا كان نفسى تبقى حاجة وتفيد البلد دى بحاجة بس ما دام بيقتلوكم انتو يبقوا هما مش عاوزين حاجة غير نفسهم احنا ملناش مكان زيكو بظبط بس احنا قالوا اكبر عقاب للشعب الوسخ ده نسيبوه ونكفره احنا ف عيشته الموت رحمة واحنا مبنرحمش الله يلعنهم يبنى الكلام رايح منى يا ضنايا وحرقة قلبى عليك اه لو تشوف بصة اخواتك ليا ولا تشوف امك وهى غايبة عن الدنيا، بس ارجع واقول الحمدلله اومال لو شفت عمك محمد وهو بيشيل جثث عياله التلاتة تقول ايه، نعمل ايه يا ابنى بس ملناش نصيب فى زرعة ولا ف ولد مكتوب علينا نتهان ونفضل من غير سند، الا قولى يا بنى مين قتلك صحيح ومتخبيش انا ولا مين بالظبط اكيد انا شايل ذنب موتك بردو منا اللى خلفتك هنا وسبتك هنا ودفنتك بردو هنا وكنت عارف ان ده هيحصل ان مكنش بالقطر ممكن تجيلى ف يوم من جيشك محمول برصاص الغدر او تيجلى وانت بتلعب مع صحابك او تجيلى وانت بتتفرج على ماتش اقولك يا ولدى نام وارتاح كده احسن يعنى لو كنت عشت كنت هتعمل ايه منت كده كده ميت 



احد الزهور يصارع براثن دولة خبيثة تحاول اغتياله 
اخر ما كتب احد الاطفال قبل حادث الاغتيال 
كراسة رسم احد الاطفال مكتوب عليها ثورة النهضة والعدل والحق
أحد الآباء يودع أمله ويقبله قبل أن يطبق عليه التراب ويخنقه 
بعض عينات الضحايا والتى قُدر سعرهم ب 4000 آلاف جنية للواحد .. تبيع !
إن مدلول ومغزى مقتل 50 طفل لا يمكن أن يكون له معنى إلا إغتيال حلم هذه اللادولة ، محاولة منها فى طمث معالم الدولة التى تحاول أن تظهر فى وعى الشعب ورغبته فى الحصول على حقه كاملا، حاربوا تلك اللادولة المتمثلة فى جهلهم وتعنتهم وتقديسهم الأسماء حتى تُقام دولة الحق والعدل وتتذوقون الحياة 
أحمد